Majan ngu ai gaw ,Ting Ying

KTG(USA)

Kokang hte Myen gap hkat ai lam hte seng nna, Majan ngu ai gaw, hten run ai lam de madung ai re majaw, mai byin ai hku koi yen ra ai, nga nna, NDA-K Ningbaw Kaba Zahkung Ting Ying tsun ai.

“N-gun ja ai hpung hpe gasat hpang ai., ngu ai gaw, atsawm n myit yu ai sha galaw dat ai lam re, byin wa ai manghkang shagu hpe myit galu kaba ai hte atsawm myit yu nna, si mani ai ladat hte hparan la ra ai, ti nang ra ai lam gaw, yawng lu yang she lu na re., rai tim, ladat shaw, aten la nna dawdan galaw sa wa ai gaw, yawng a matu kaja htum re” nga nna Ningbaw Kaba Ting Ying, Kachin Today de tsun ai.

Shi matut tsun ai hta, amyu sha rawt malan hpung ni a lapran sumprat bang, sai garan nna, rawt malan hpung langai hpang langai hpe tek jum lu hkra ladat shaw galaw nga ai Myen hpyen a masing hpe hpa rang rip na lam n nga ai rai tim, shada da chye na shut ai lam hpe atsawm mahtai n lu shaw yang gaw, dinghku majan bai byin wa mai nga ai, nga ai.

NDA-K hpe ga jarik sin hpyen dap hkrang galai kau na masing hpe 2009 ning rai nhtum shi yang ngut kre hkra galaw sa wa na matu hkyen lajang nga sai lam hpe mung chye lu ai.

October shata hta hpang jahtum da nna ga jarik sin dap hkrang galai na matu Myen hpyen dap kaw nna, matsun da ai rai tim, NDA-K hpung kata hta hkyen lajang ra ai lam rai n jin shi ai majaw, aten loi naw la ra ai nga nna, Ningbaw Kaba Zahkung Ting Ying, Kachin Today de tsun ai.

Shi matut tsun ai hta, “ Myen hpyen dap hte myit hkrum da ai hte maren, shan hte (Myen) hku nna gaw, NDA-K ga jarik sin dap hta shanglawm na matu jin jin rai sai, raitim, anhte NDA-K hpung kata, galaw ra ai lam ni, n jin shi ai majaw, Myen ni hpe naw la shangun da ai re” nga ai.

NDA-K Ningbaw Kaba Zahkung Ting Ying, shi nan mung daru magam zingla hkrum lai wa sai rai tim, NDA-K hpung hpe Myen hpyen dap, laba ka up kau na masa kaw nna, zai ladat shaw koi yeng tawt lai lu wa yu sai re

Read more...

Kokang Hte, Jinghku Hpyen Hpung

KTG(USA)

1989 ning kaw nna, Myen hpyen asuya hte simsa lam la da ai ,Kokang hte, myen hpyen dap lapran, August 27 ya jahpawt kaw nna ,bai gap hkat hpang wa sai lam, Miwa ga jarit shiga lawk kaw nna chye lu ai.


Ndai shata praw hta, daru magam zing la hkrum ai, Kokang ningbaw Pheung Kya-Shin hpe, madi shadaw ai hpyen hpung ni gaw, Miwa hte Myen ga jarit, Lao Kai jarit sin myen pya da dap hpe, shang kasat hpang wa sai re lam chye lu ai.

Ndai gasat poi hta, myen pya da (3) si nna, marai (27) hpe mung rim la lu ai lam, ga jarit shiga lawk kaw nna , sagawn chye lu ai.

Ya ten hta, Lao Kai, Ching Shwe Haw hte ,Lao Kai hte Ching Shwe Haw lapran, hpyen man shara masum hta, Kokang hte Myen hpyen dap maja matut gasat hkat nga ai hte, dai August 27 ya shana daw de na, gasat poi hta, Ching Shwe Haw mare na ,myen hpyen a ,shawnglam hpyen dap langai hpe, lu zing la sai lam na chye lu ai.

KIA, Wa, Kokang hte Mailar hpung ni gaw, jinghku hpyen hpung ni hku nna ,myit hkrum tawn da ai lam nga ai majaw, Myen hpyen hpe gasat ai lam hta ,Kokang hte pawng nna Wa hte KIA hpung ni mung shanglawm nga sai re lam, shateng n lu shi ai shiga ni kaw nna, sagawn chye lu ai.

“Majan hpang sai ga re.., Kokang kaw gasat hpang ai majan gaw, myen mung shara shagu de chyam bra wa na sha rai sai” nga nna buga Salang langai Kacin Today de tsun ai.

Ya ten hta, Kokang hpyen dap hpang de, garum gasat ya na matu, Wa hpyen la 2,000 darum du nga sai lam hte, KIA dap ba (4) mung dai manghkang hpe grai sadi maja let, la yu nga ai, nga nna KIO shingwang kaw nna ,chye lu ai.

Read more...

Mawshe

1. Hkye la ai amu galaw na Ningbaw Ningla wa a sat lawat.Mawshe hpe yu ai shaloi, shi gaw Hebre amyu re ai lam hpe dum chye wa sai. Hkawhkam shayi sha Bathiya bau la nna Egutu hkawhkam hkaw kaw nga kaba wa ai wa rai nga ai. Egutu hkawhkawm hkaw kaw nga kaba ai, ngu ai lachyum gaw Egutu masha tai wa sai ngu ai lam rai ai.
Egutu hpyi hpe gun kau na matu n li la nga ai. Mawshe gaw naw kaja nga ai ten kaw nna shi Hebre amyu re ai lam hpe shi hpe chyu shachyu ai Kanu, shi hpe yu lanu lahku ai kana Meriam kaw na chye la ang ai ngu myit la shara nga ai. Shi Egutu hkaw-hkam kasha ni chye la mai ai baw hpaji mahkra hpe hkaja la ra; raitimung, lak-lai ai lam langai mi gaw, Egutu amyu a Jan hpara hpe shi n nawku wu ai; raitimung shi a amyu Karai Kasang hpe mung shi n chye wu ai. Shi Egutu amyu n re hpe dum wa ai ngu ai gaw, Egutu ni lu la ai baw ahkaw ahkang hpe shi n lu la na lam mu lu ai lam mung rai nga ai.

Lu la ai ngu gaw shi a amyu a matu n lawm nga ai, shi langai a matu sha rai na hpe shi chye nga ai. Shi Egutu amyu n re ai hpe dum wa ai ngu ai gaw, tinang amyu maga shang tsap ai lam rai nga ai.

Shanghte hkam sha nga ai majaw, shi a amyu ni hpang de shi sa yu ra sai; shanhte rau nga yu, shanhte hkam sha nga ai, mayam galaw ai kade chyum sha nga ai amyam kandang hpe shi hkrak sha katut sha yu nu ai.

Shaloi, ndai hku sha mayam tai na matu shinggyim masha tai ai rai ni? ngu ai ga san san wa ra sai.

Egutu amyu ni mung, Hpara-u mung shinggyim masha rai da ninglen, kaga ni hpe dusat zawn yam sha nga ai lam hpe mu lu nu ai. Ndai mayam kandang kaw na lawt na ginjang tam ra wa sai; mayam ni hte rau rawt malan yang she mai na lam shi dum wu ai; raitimung, shi a amyu ni gaw mayam tai ai nau na sai majaw lawt lam nga ai hpe, shakut na hpe pyi n dang kam mat masai.

2. Gumshem magam Hpara-u a sat lawat.

Egutu mung hta shanglawt lu ai gaw Hpara-u sha rai nga ai, shi a npu e Ramse kaw na hkawhkam malai wa, dai hpang hkinjawng Cecknece, dai hpang amu hpareng ni, Hebre amu hpareng Kora, Dahtan, Abiram ni mung Hpara-u wa gam jaw ai made ahkaw ahkang lu ma ai, raitimung, shanhte mung mayam hpe shagrau ai hku ahkaw ahkang lu ai ni sha rai nga la ai.

Hpara-u gaw yu maya shinggyim masha n rai nga ai, shi hkum hpe Ra kasha shing nrai, Ra nan rai nga ai hku myit la wu ai; lachyum gaw shi a hkum hpe Karai re hku myit la wu ai. Mayam ni yawng mung shi hpe Karai hkum hku myit la, madat mara nga ma ai.

Dai hku myit rawng hkra mung, mayam ni hte kaga nawku htung, Karai Kasang n naw n ku shangun nga ai; kaja ai kaw nna Ra ngu ai Hpara-u hpe sha nawku ra ai lam sharin shaman bang da sai re majaw, shanhte a myit masin nta dai hku sha rawng mat malu ai.

Hpara-u mung, shi hkum hpe Ra re ai hku sha myit la wu ai; hpa majaw nga yang Egutu mungkan gaw shi hpajang ai hku sha nga pra ma ai. Mam dum, sut dum, lamu ga, dum nta, mayam num, mayam la ni hte dai ni a kashu kasha ni mahkra shi a rai nga ai. Shi a dum kaw na hpaw jaw nna shanhte hkru kat nga ma ai; shi jaw nna shanhte sha lu nga ma ai, shi bau nna asak hkrung ai she rai nga ma ai. Shanhte galaw ai gaw shanhte a matu n lawm nga ai; Hpara-u a matu sha rai nga ai.

Dai majaw Hpara-u gaw shanhte a chyeju asak daju rai nga malu ai. Hpara-u a nta kaw na sinpraw de mung, sinna de mung, lagaw lahkam mi sit mat na n mai byin sai; shat kyet nna si na lam sha nga mat sai.

Ndai hku nna mayam a myit masin gaw myit makru daw mat nna kade sa wa na lam mung n hku nga ai. Ndai baw mayam myit masin byin wa hkra Hpara-u gaw zai ladat shaw nga ai. Mayam ni hpe hkauna galaw shangun tim, tinang a matu n mahkawng da shangun ai; dum lu ai gaw Hpara-u sha rai nga ai; shi a dum kaw na pru ai sha mayam ni rai ma ai.

Hpa sut rai mung shanhte hpe n madu shangun nga ai. Dai hte maren mayam ni hpe tinang a kun dinghku de na ahkang mung n jaw mu ai, kasha shangai tim, Hpara-u a mayam ni sha jat ya na matu sha rai nga ai.

Mayam ni kun dinghku nga yang gaw, law htam mayat maya wa nna, hkawhkam wa hpe gumlau na tsang shara nga ai majaw, kun dinghku n nga hkra di wu ai. Mayam ni gaw Karai Kasang mung, nawku htung mung n nga hkra di wu ai; shi Hpara-u hpe sha madat mara, nawku hkungga nna asak hkrung na hku di wu ai; dai majaw mung shi a hkum hpe Ra a kasha ngu shamying wu ai, mayam ni gaw shi hpe nawku ai hta myit dik wa ra malu ai; kaji ai kaw nna hpa Karai Kasang a lam mung shanhte hpe n sharin ya ai; shi hpe nawku dawjau na lam sha sharin ya sai majaw, mayam ni a myit hta Hpara-u Ra Karai sha rawng nga malu ai.

Mawshe gaw ndai lam hpe mu lu ai majaw, hpa Karai mung shi n nawku wu ai, dai mung shi a matu shanglawt lu ai lam rai nga ai. Kaga mayam ni hte Hebre mayam ni shai ai gaw ndai lam lahkawng; kun dinghku lu, nawku htung ngu ai gaw masha hpe myit mada na lam, lawt lu na lam jaw ya nga ai majaw ninggun lu nga ai.

Mungkan masha Hpara-u gaw shinggyim masha sha re ai hpe chye nna, shi hpe gumlau na ninggun mung jaw ya lu nga ai; shi a lata kaw na shalawt dat na wa nga ai hpe mung dum lu na ma ai. Dai hta n ga, Hpara-u gaw mayam ni gumlau myit rawng n rawng yu yu na matu kin-yu latsa mung dat tawn da nga ai. Egutu kin-yu, Hebre kin-yu ni shi lu nga ai.

Dai ni hpe gindan ai arawng aya mung shi jaw da nga ai majaw, dai ni gaw Hpara-u a mayam tai pyaw dum nga ma ai, tinang mung mayam re ai hpe n dum hkraw nga ma ai.

3. Mayam A Sat Lawat

Lahta de tsun lai wa sai hte maren mayam a myit masin gaw, tinang a myit masin majing n re ai sha, up yam sha ai ni e kaji ai kaw nna bang yam sharin ya, shaman da ya ai myit masin rai malu ai.

Madu ni hpe n gumlau lu hkra, madu ni hpe chyeju madu asak daju ngu myit la hkra sharin ya sai lam rai nga ai. Myen mung hta mung, ndai raw byin wa sai; lai wa sai 26 ning tup, mung masha ni a mam hpe magawn la nna shi a mam dum hta mahkawng da, n-gun rin nna bai dut jaw, di nna mung masha ni hpe woi nga ai shaloi, rung amu gun hpai ai ni hkum tsun, yi sun hkauna galaw sha ai ni du hkra shanhte hpe chyeju madu, asak daju hku myit la wa masai; shanhte n jaw sha yang gaw si wa na daram rai wa sai; dai gaw mung masha ni a lata de n-gun n nga hkra di ai majaw rai nga ai.

Shinggyim masha a myit masin hpe up sha ai lai nan nga nga ai; daru magam ahkang lu ai ni prat ban mi hte ban mi lang lai wa sai hpaji ladat sha rai nga ai. Masha a myit mahkru shadaw kau ai lai nan rai nga ai; kawsi shakyet, yup n lu sha hkra, n dung lu, n galeng lu hkra di jamjau ai hpang, lusha jaw sha, pyaw pyaw yup shangun, akaw alaw ngu hkalum la di jang, shinggyim masha gaw tinang hpe zingri ai ni hpe tsaw ra myit kap wa, chyeju dum mayu ai myit pru wa rai, nawku madat mara ai myit pru wa chye ai gaw shingra rai nga ai.

Hpri tawng hpe raitim magyi yu, malan yu di shatsawng yang daw hten chyalu sha rai nga ai, amu hte ninggun dat nra mat ai majaw awng dang na yak nga ai.

Rawt malan amu manu dan nga ai; dai gaw shinggyim masha ahkaw hkang sari sadang a matu shakut ai re. Karai Kasang gaw shinggyim masha ni hpe tara rap ra ai hku nga pra na matu she hpan da ai re majaw, dai byin na matu shakut ai amu gaw manu dan ai; Karai Kasang ra sharawng ai lam re majaw, na ai n na ai lam she nga ai, lani mi na nhtoi hta gaw teng teng awng padang kaw she kre na re ai hpe kam ai myit chyinghkrang tum daram sha pyi yawng a myit hta rawng ra yang she mai nga ai, lu mayu ai myit rawng yang sha lu na re.

Rev. NNgai Gam
(N nga mat sai Sara Kaba Rev. NNgai Gam a, Sengngai Shanan Magazin kaw nna, laika ngau hpe bai tang madun dat ai re. Laika ka Sara wa a ningmu sha rai nna, Kachin Today Group (USA) a ningmu n re ai lam chye sha ngun dat ai.)

Read more...

MUNG CHYING SHA MAKAWP MAGA MASA

KTG(USA)
Sutgan lu su ai mungdan ni gaw shanhte mungdan de htawt shang wa ai masha ni hpe n hkap la ai hku nna, sut masa grit yawm wa ai hpe htang ma ai.
Hpaga sut masa awng dang ai shaning ni hta htawt shang wa ai maigan masha amu galaw ai ni gaw Calaifornia dingda maga lwidwi sun ni hta namsi di ma ai. Spain hte Ireland mungdan ni hta gaw dum nta gap ma ai. Silcon Valley hta gaw computer software galaw ma ai. Sutgan lu su ai mungdan ni hta nga ai jak rung ni hta amu galaw ma ai. Sut massa hkrat sum wa tim mungdan law law hta dai zawn matut amu galaw nga ma ai. Rai tim lu su ai mungdan law law hta gaw, bungli n lu ai masha law wa ai hte maren, shanahte a mungdan de htawt shang wa ai ni a ntsa e tawn da ai myit masa grau yak wa ma ai.

Northern Ireland (dingdung) mungdan na Romania masha ni hpe gasat ai lam hte, Austrtralia mungdan na India masha ni hpe galsat ai lam gaw dai buga mung chying sha ni a tatut myit masa dawng dik ai lam hte amu bungli galaw ai maigan masha ni hpe hkrit ai sakse rai nga ai.
Dai majaw, mungdan Atsuya ni law law mung masha pru shang masa hpe grau shachyat wa ma ai lam June 30 (Bat 2 ya) na OECR shi laika hta dip shabra ma ai. Asuya ni gaw maigan masha ni galaw ai amu kaba hpe shayawm nna, htawt shang wa ai hpe tara grau chyat ai hku nna, maigan masha majoi mi n shang wa na matu pat hkum shakut nga ma ai. Mungdan Asuya nkau mi gaw, maigan mung na amu sa galaw ai masha ni hpe shanhte nta buga de wa na lam jarit pyi htuk jaw nga ma ai.
Mungdan law law gaw,, shanhte a mungdan kata e amu galaw nga ai maigan masha ni hpe tara shang hti hkum shayawm nna hkap la wa masai. Spain mungdan gaw 2008 shaning hta maigan msha 15,731 hpe bungli galaw na saw shaga la ai rai tim, dai ning gaw 901 hpe sha tara shanag hkap la sai. Italy Asuya gaw 2008 ning hta maigan masha 70,000 hpe hkapla tim, 2009 ning hta gaw maigan masha n hkap la sana lam ndau shabra ma ai.

Dingda Korea gaw maning maigan masha 72,000 hpe Employment Permit Scheme hku hkap la tim dai ning gaw 17,000 sha hkap la na masat ma ai. Australia gaw dai ning kungkyang ai maigan bungli masha 133,500 hpe hkap la na lam ndau ngut ai hpang tatut hta gaw 108,100 sha hkap la na ngu bai shayawm kau ma ai.

Mungdan tsawm ra mi gaw nta amu galaw na masha (domestic workers) hte kungkyang ai hpaji ninghkrin ni ( appropriate skills preferential treatment ) ni hpe shawoi na hte maren naw hkap la nga ma ai. Rai tim mungdan law law gaw grai shayawm nna hkap la wa sai. Spain mungdan gaw 2008 October shata na jahpan hte maren nga yang kung kyang ai bungli masha 1/3 shayawm nna hkap la sai lam chye lu ai.

Mungdan nkau mi gaw, bungli madu ni bungli masha hkap la ai masa tara hpe grau shayak wa ma ai. Ga shadawn Britain gaw shanhte mungdan na bungli madu ni maigan bungli masha shap na rai yang hpa baw bungli kaw tawn da na ngu ai hpe ndau shalawm ra ai ngu nna tara jahkrat ma ai.

America kaw mung Employ American Workers Acts (American masha hpe amu jaw ai tara) hpe shaning shagu na gumhpraw shang ai jahpan hta shalawm nna, Asuya gumhpraw hpe hkap la ai hpaga hpung (company) ni hpe shayak ma ai.

Bungli kung kyang ai maigan masha ni hpe shap mayu ai bungli madu ni hpe mung mungdan a H-1B masing masa hta tawn da ma ai. Dai majaw Austria gumhpraw fum nkau mi hte gumhpraw hpaga hpung nkau mi gaw, American Dakkasu ni kaw na awng pru ai maigan masha ni hpe bungli jaw ai lam bai dawm kau ma ai. Bungli galaw sha na ahkaw ahkang maisau lu da sai ni hpe mung dai ahkaw ahkang bai matut na lam lu la yak shangun ma ai.
Kaga mungdan nkau mi gaw, maigan masha nnan n shang wa hkra, masha hti hkum shayawm nna hkap la ai hta n-ga, nga nga sai maigan masha ni kaw na bungli n lu ai ni hpe tinang a nta de wa kau shangun na matu wa lam jarit hktuk ya ma ai. Ga shadawn EU a shinggan na mungdan masha ni Spain mungdan kata e amu sa galaw nga ai ni hpe tinang a mungdan de wa nna 3 ning laman bai n sa wa ai sha wa nga na matu Spain mungdan Asuya a hkaw ahkang hpe hkam sha shangun na tara hpe mung maning November shata kaw na ndau ma ai. Czech Asuya gaw bungli jahkring kau hkrum ai maigan masha ni hpe nta wa na nbung li shabrai Uro 500 (US$ 704) jaw na lam ga sadi jaw ma ai
Dai ning March shata htum hkra rai yang bungli galaw masha 1,100 dai ahkaw ahkang hpe hkam la masai.
Ya na hku buga masha ni bungli n lu mat ai jahpan grau law na ladu lai sawng wa yang, mungdan masha pru shang tara grau shaja wa nna masa nga ai. Bungli n lu ai masha 18% nga ai Spain mungdan hta maigan masha shang wa ai hpe jep shachyat ai gaw mau hpa n rai nga ai.
OECD gaw, ndai zawn tara shaja ai majaw byin wa lu ai manghkang hpe madi madun nga ai. 1970 jan shaning hkan wan sau manu hkrat ten hta Germany, France, hte Belgium mungdan ni hta maigan masha shang wa ai hpe pat hkum ai gaw, sut hpaga lam bai kaja wa tim matut nna pat hkum na masa nga ai.
Ntsa lam hku gumhpawn yu yang, mung masa yak ai majaw, sut masa mi bai kaja wa tim. Mungdan ni hku nna gaw tara hpe matut shaja na lam nga ai. Tsi mawan bungli hte engineer bungli zawn re ai bungli hta kung kyang ai masha n law ai manghkang nga nna dai shara ni hta buga madu mung chying sha ni shang galaw na kung kyang ai mashsha n nga ai. Ya na zawn dai bungli ni hta kungkyang ai maigan masha ni hpe hkap la ai tara shaja ai majaw ndai manghkang gaw grau laja lana byin na lam nga ai.
Dai hta n-ga bungli shang galaw nga sai maigan masha ni hpe matut galaw na ahkaw ahkang shayak ai majaw, tara n shang ai hku matut nga nna bungli galaw sha ai masha law wa na tsang ra ai. Tinang nta de wa ai ni hpe 3 ning shabrai htuk jaw na ngu ai masa mung 2010 ning sut masa bai kaja wa ai shaloi dai masha ni hpe bai sha ga la ra na masa nga ai.
Mungkan sut masa bai kaja wa yang maigan bungli galaw masha ni hpe hpaga hpung company ni pat hkum ai tara a majaw, dai maigan masha ni la sa ai ahkaw ahkang hta mugdan langai hte langai n bung na re. Ga shadawn, maigan mungdan na bungli galaw masha ni gaw 2003 ning hte 2007 ning laman Austria, Denmark, Italy hte Spain mungdan ni hta bungli lu ai lam 2/5 jan rai nna, Britain mungdan hta 71% rai nga ai.

(Economist.com na, People Protectionism hpe ga gale da ai re. ( Editor Hpung)

Read more...

KWAT-Lithkam

Thai mungdan daju ,Jinghpaw Wunpawng Amyu Shayi Hpung (KWAT) a lit hkam, Srn.Mary gaw , lai wa sai August 14 ya shani, mawdaw adawt hkrum ai ning ma a majaw ,Chaingmai, Htep Banya tsirung (I.C.U) hta ga lajang hkam la nga ai lam, KWAT a garum hpyi ndau laika kaw nna chye lu ai.

Asak (3) ning ,shayi sha hpe jawng sa, sa ai lam kaw, Mawdaw adawt hkrum ai hta, la pai magyi na sai lam kanu di mat nna, sai hkaw lai mat ai hte, ning ma grai sawng mat ai majaw, lahkawng lang ga lajang da sai rai tim, matut nna naw ga lajang ra ai lam hpe mung chye lu ai.

Ya ten hta, Oxygen garum hte, asak matut nga ai Srn.Mary gaw, Sai matut bang ra nga ai hte ,Sinde (Kidney) mung hten mat ai lam chye lu ai.

Tsi lajang manu ,lani mi Bat 100,000 (Sen Mi ) daram ang ai rai nna, lai wa sai August 18 ya shani du hkra rai yang, gum hpraw Bat 500,000 (Sen Manga ) daram jai lang ang wa sai re.

Wunpawng amyu sha ni a matu, shakut shaja nga ai Srn. Mary a asak hpe ,hkye la lu na matu tsirung hta ,gade naw na hkra rawng ra na re ai n chye ai hte, tsi jahpu ni hpe jaw na matu, Srn. Mary a kun dinghku hte ,KAWT hpung hta ,ja gumhpraw grai yak hkak nga ai lam a majaw, ya na zawn, KAWT kaw nna ndau shana, garum hpyi dat ai re lam hpe mung chye lu ai.

Maigan mungdan hta grai magrau grang ai hte ,Wunpawng amyu sha ni a matu aten tup ,ap nawng shakut shaja nga ai Srn. Mary a tsi manu a matu ,maigan du ,Wunpawng amyu sha ni hku nna, tsaw ra shawang myit hte, dangdi dangdep ai made jawm garum madi shadaw la na hpe, Kachin Today kaw nna grai myit mada let, hpyi lajin dat ga ai re.

Srn. Mary hte seng nna chye mayu ai lam nga yang, Jacinta ( 086-9145-158), Shirley (086- 9238-854), Monica (086-1921-124) hte Email: kwat@loxinfo.co.th, de matut mahkai mai ga ai. kachin news today

Read more...